إذا المراجـل لبسـة شمـاغ وعقـال ***** قـل للـعـذارى يلبـسـنّ العمـايـم
ما عاد يفـرق زول حرمـه ورجـال ***** دام الفعايـل تشبـه البـعـض دايــم
المرجلـه مـا هيـب كلمـه وتنقـال ***** وتروح مـا راحـت هبـوب النسايـم
وإلا خشونة صوت أو رفـع الأثقـال ***** أو رزة صــدور وفـعـل الـزلايـم
ولا هي بعد مفتـاح موتـر وجـوال ***** وإلا ردى لسـان حديـثـه شتـايـم
المرجله شيمـه عـن القيـل والقـال ***** رفيع نفـس (ن ) حـر بالجـو حايـم
المرجلـه عقـلٍ وزن وزنـه جبـال ***** ودون العقـل وش فرقـنـا والبهـايـم
يا مسندي لو مايل الوقـت بـي مـال ***** يـا ولـد أبويـه يـا عظيـم العزايـم
يا معرب الجدين مـن العـم والخـال ***** يـا نخـوة المفـزوع وقـت الهزايـم
المرجله يا خوي هـي طولـة البـال ***** هـي العـزم هـي الصبـر فالظلايـم
فيهـا الكـرم عـزه دلـه وفنـجـال ***** فيها الكرامه عـن ردى الطبـع شايـم
والدين لامنـه خـذا القلـب منـزال ***** مشـى طريـق الحـق وابليـس نايـم
ومن لا عرف ربه في طيـب الحـال ***** لابـد وقـت الضيـق بالـهـم هـايـم
حتى صلاتك مع جماعـات ورجـال ***** في خيرهـا يـا خـوي نعـم الغنايـم
ولامن نصف ليلك قـم صفـي البـال ***** يا عظـم أجـرك بيـن ساجـد وقايـم
ولا من رفع ربي لـه كـل الأعمـال ***** حسـن الذكـر لا قالـو فـلان صايـم
وخلك شريف القصد يا طيـب الفـال ***** سـوء المقاصـد فالبـيـوت الهـدايـم
واحذر تبيع النفس فـي درب الأنـذال ***** وتتبـع خـوي إبليـس راع النمـايـم
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.